Suche
  • Sabina Jaggi

Dr Güggu mit Säubstmordgedanke

Aktualisiert: 29. Jan.

Dr Fridolin isch ä Schwedische Bluemehuhn-Güggu, wo ig vor öppe 3 Johr säuber (natürlich mit äm Bruetapparat) usbrüetet ha. Sithär wohnt är im Bouwage mit de Legehenne zäme.

Im Gägesatz zu viune angere Güggle, isch är unuffällig im Verhaute u ou ziemlich flexibu, was sini Froue ageit (die wärde haut ou öppe gwächslet) und är isch ou ä würklich hübsche Kärli, so dass mir das eigentlich gliich isch, wenn är ir letschte Zyt regumässig mit paar vo sine Froue us äm Gheg usbricht u de uf dr ganze Weid umestouziert. Irgendwie het dä no Marketing-Wärt, han i no so bi mir dänkt, wo är chürzlich fiedlich näb mir im Gras umepickt het.


Mi Fründ, wo sich ou öppe mine Hühner animmt, gseht das chli angers. Irgendwie mache sich die zwe ä Sport drus, wär wän wieder verwütscht, dr eint mit usbräche, dr anger mit wieder ifo. (Amerkig vor Autorin: isch i mine Ouge chlei äs Güggu-Gehabe, aber ou ziemlich amüsant ;-)).


Geschter het de mi Fründ gmeint, är müess äm Bouwage mit dr Motorsogi chlei öppis verbessere u ä Bauke versogt. Äs isch scho äm Idunkle gsi, ä Zyt, wo d Hühner eigentlich so langsam uf ä Sädu stiege u me cha sich ir Regu ou druf verlo, dass sie das zueverlässig immer mache.

Äs isch nid lang gange, do isch mi Fründ zu mir i d Chuchi cho, u het mit äm ne liecht süffisante Ungerton gmeint: "I gloub, dr Güggu het Säubstmordgedanke!! Wo ig d Motorsogi aglo ha, isch dä (dumm Cheib) wiit wäg gsecklet, gäge Waud zue u i ha ihn nümme gseh!"

Ig drufabe: " Du, ä däm Hang i de!! Wenn dä nid geisch go sueche, fäut dä morn! Dr Fuchs macht hie keini Usnahme!".

Dr Julian, mi Öuter, het sich de solidarisch zeigt u mim Fründ abote, mit go häufe sueche. Ungerdesse isch s scho fasch dunku gsi u me het de zersch no müesse ds Velo pumpe, dass me überoupt wäg cho isch. I ha bi mir no so dänkt: "Das het eigentlich kei Sinn meh! Dä Güggu isch Gschicht!"


Öppe ä haub Stung spöter chöme die zwe mit de Velo zrugg. Dr Güggu heige si de schlussändlich no gfunge, aber si hei partout nid wöue säge wo!! Ou us äm Julian isch nüt usezbringe gsi- die zwe hei zäme wie Päch u Schwäfu!


Spöter äm Obe- me het de scho äs Glas Wy trunke gha- isch dä Herr de aber doch no usegrückt mit dr Sproch: Dr Güggu isch scho wieder im Stau uf sire Stange ghocket gsi- är heig ne vor der "Velotour* nume nid gseh gha, wüu är ds Füddli gäge vorne gha heig bzw. dr Chopf zur Wand.

Ob dr Güggu sich jetzt villicht gschämt het oder är sim Konkuränt us Schadefreud z Füddli zuegstreckt het...mir wärde s wahrschiinlich nie erfahre. Aber mini Manne hei chlei Sport gha u i ha mi ziemlich amüsiert!



43 Ansichten0 Kommentare

Aktuelle Beiträge

Alle ansehen

Bei uns bekommen alle Tiere einen Namen, ganz gleich, wie Ihr Schicksal angedacht ist. Die Kälbchen taufte ich je nach ihrem Aussehen Pavarotti, Mango oder je nach politischer Aktualität auch schon ma

Auf dem Jaggihof lebt ein Huhn mit dem Namen Emma. Emma ist braun und unterdessen schon mehr als ein Jahr auf dem Hof. Die Hühnerdame hat eine ganz besondere Geschichte und dass sie heute noch Eier le